Унгарија ги затвора своите граници за странците на 1 септември, а Унгарците кои се враќаат од странство ќе треба да одат за самоизолација, изјави шефот на кабинетот на премиерот Виктор Орбан.
Унгарците ќе можат да излезат од 14-дневната самоизолација само ако имаат два негативни теста на Ковид-19, рече Гергели Гулиас.
Исклучоци од ваквата забрана ќе има само за преминувањето на воени конвои, хуманитарни работници и деловни и дипломатски патувања.
„Бројот на инфекции е зголемен и повеќето доаѓаат од странство“, рече Гулиас на прес-конференција.
Тој вели дека ограничувањата се потребни поради почетокот на учебната година следната недела и да се заштитат луѓето и економијата.
Унгарија во петокот пријави 132 нови инфекции, што е највисок дневен рекорд од самиот врв на пандемијата. Земјата бележи вкупно 5.511 заразени и 614 мртви. Унгарија започна да ги ублажува ограничувањата во јуни.
