Официјални лица од градот Мариупол, во југоисточна Украина, недалеку од границата со Русија, велат дека стравуваат од голем број жртви по повеќечасовното руско гранатирање.
Заменик-градоначалникот Сергиј Орлов вели дека населба крај реката, дом на околу 130.000 луѓе, вклучувајќи го и неговиот татко, е речиси целосно уништена.
„Не можеме да ги изброиме жртвите таму, но се плашиме дека барем неколку стотици се мртви. Не можеме да одиме таму по телата“, изјави тој во телефонски разговор со Би-би-си.
„Руската армија овде го користи целото свое оружје – артилерија, повеќецевни ракетни фрлачи, авиони, проектили… Тие се обидуваат да го уништат градот“, рече Орлов. Тој вели дека руските сили го опколиле градот од сите страни и дека се на неколку километри.
„Украинската армија е многу храбра и ќе продолжи да го брани градот, но Русите напаѓаат како пирати. Тие не се борат, тие едноставно уништуваат цели населби“, рече Орлов.
