Министерството за надворешни работи на Украина утринава соопшти дека ја смета подготвеноста на Унгарија да плати за рускиот гас во рубли за „непријателски чин“ и дека односот на Унгарија кон руските злосторства го зајакнува чувството на неказнивост на Русија и ја охрабрува Русија „да изврши нови злосторства против Украинци“, пренесува „Гардијан“.
„Ако Унгарија навистина сака да помогне да се стави крај на војната, еве како да го направи тоа: да се запре уништувањето на единството на ЕУ, да се поддржат новите антируски санкции, да се обезбеди воена помош за Украина и да не се создаваат дополнителни извори за финансирање на руската воена машинерија. Никогаш не е доцна да се оди на вистинската страна на историјата“, изјави портпаролот на украинското Министерство за надворешни работи, Олег Николенко.
Унгарскиот министер за надворешни работи Петер Сијарто потврди дека горивото за унгарските нуклеарни централи пристигнало со авион од Русија. Нападот на Русија врз Украина ја попречи железничката испорака.
Тој нагласи дека Унгарија не ги поддржува предлозите за воведување енергетски санкции кон Русија во ЕУ, додавајќи дека наметнувањето какви било санкции за активности поврзани со нуклеарното оружје, исто така, ќе биде „црвена линија“ за Унгарија.
Според „Гардијан“, во последните денови има растечки тензии меѓу Унгарија и Украина, откако Виктор Орбан го опиша украинскиот претседател Володимир Зеленски како еден од непријателите што ги победил со неговата изборна победа за време на викендот.
Зеленски рече дека Орбан се плаши од Москва и дека мора да избере меѓу Русија и остатокот од светот.
