Новиот сопственик на Твитер, милијардерот Илон Маск, денеска објави дека ќе го одблокира профилот на поранешниот американски претседател Доналд Трамп.
Маск изјави дека суспендирањето на Трамп е погрешно, пренесува „Вашингтон пост“.
„ Мислам дека не беше во ред да се забрани Доналд Трамп. Мислам дека тоа беше морално лоша одлука, и да бидам целосно јасен, крајно глупава“, рече тој на настанот наречен „Иднината на автомобилите“ организиран од „Фајненшл тајмс“.
Тој додаде дека не е во ред да се блокира Доналд Трамп бидејќи тоа „отуѓило голем дел од земјата и на крајот не довело до тоа Трамп да нема глас“.
Трамп претходно изјави дека нема намера да се врати на Твитер дури и ако неговиот профил биде одблокиран. На Трамп му беше забранет пристапот на Твитер откако неговите поддржувачи упаднаа во Капитол. Тој самиот ја нарече оваа социјална мрежа срам за демократијата.