Во акцијата насочена против шверцерите на антиквитети во турскиот град Измир, запленета е статуа од периодот од 9.500 години пред нашата ера, јавуваат агенциите.
Полициската управа во Измир соопшти дека екипи на Службата за борба против криумчарење утврдиле дека шверцерите од Мардин ќе го донесат антиквитетот во Измир.
Во организираната акција е одземена статуа висока 70 сантиметри и широка 30 сантиметри, за која се проценува дека потекнува од праисторискиот период, односно од периодот 9.500 години пред Христа.
Статуата има слични карактеристики на оние пронајдени за време на археолошките ископувања во други делови на земјата, вклучувајќи го и популарниот локалитет Гобеклитепе.
Статуата е предадена на Дирекцијата за музеи во Измир, а три лица се приведени.