Кинеските хакери ја таргетираат изборната инфраструктура во САД, предупреди во неделата советникот за национална безбедност на Белата куќа, Роберт О’Брајан, пренесува „Њујорк пост“.
„Тие би сакале претседателот да изгуби. Кина, како Русија и Иран, се вклучи во сајбер напади на нашата изборна инфраструктура, кон веб-страниците “, изјави О’Брајан за „Фејс оф д нејшн“ на Си-би-ен њуз.
„Тоа е вистинска причина за загриженост“, додаде тој, велејќи дека хакерите се обиделе да пристапат до владините веб-страници, како и да влијаат врз операциите, без разлика дали се наоѓаат на ТикТок или Твитер.
Тој рече дека претседателот Трамп се стекнал со непријатели со тоа што е построг кон Кина од кој било претседател во историјата.
„Без разлика дали станува збор за Кина, Русија или Иран, нема да го трпиме тоа. И ќе има сериозни последици за која било земја што се обидува да се меша во нашите слободни и фер избори. Без разлика дали нивните лидери го претпочитаат Џо Бајден или Доналд Трамп. Ние сме Американци. Нема странски држави да одлучат кој ќе биде нашиот следен претседател. Тоа е дрскост “, вети О’ Брајан во првото телевизиско интервју откако се опорави од коронавирусот.
Во очигледна директна порака до обвинетите нации, тој повторно рече: „Не вмешувајте се во нашите избори… Не го правете тоа затоа што ќе има сериозни последици“.
О’Брајан рече дека администрацијата на Трамп јасно ѝ дала на знаење на Русија да се држи настрана од изборите и покрај извештајот од кабинетот на директорот на националната разузнавачка служба во петокот, во кој се вели дека Кремљ се обидувал да го понижи Бајден, давајќи поддршка за кампањата на Трамп.
„Не остана речиси ништо за санкционирање кај Русите“, рече О’Брајан, тврдејќи дека ниту една администрација не била построга кон нацијата уште од очигледното мешање на изборите во 2016 година.
„Санкциониравме еден куп Руси – поединци, компании, влади. Протеравме огромен број руски шпиони. Ги затворивме сите нивни конзулати на Западниот брег. Ги затворивме дипломатските капацитети. Не останува многу што можеме да направиме со Русите “, рече тој.
