Унгарскиот министер за надворешни работи Петер Сијарто рече дека главната причина што Унгарија набавува вакцини од алтернативни производители е тоа што Европската унија е премногу бавна во процесот на дистрибуција.
Иако Унгарија, како членка на ЕУ, е дел од официјалниот механизам за набавка на вакцини, властите на оваа земја одлучија да набават 2 милиони дози на руската вакцина Спутник V, што предизвика спротивставени коментари во рамките на ЕУ.
„ Очекувањата од ЕУ беа навистина големи, но сега гледаме дека дистрибуцијата на вакцини е многу побавна и се доставуваат помалку вакцини во земјите отколку што беше ветено на почетокот. Сепак, некои европски институции и бирократи продолжуваат да ги напаѓаат земјите кои бараат алтернативни начини за да набават вакцина. Ова е најважното прашање во моментов и ние сакаме да ги спасиме животите на нашите граѓани “, рече Сијарто.
