Гевгелија, 27 мај 2020 (МИА) – Деновите пред почетокот на уписот на првачињата на 1 јуни, основните училишта во Гевгелија ги користат за обновување на училишните згради кои до почетокот на идната учебна година нема да бидат повторно отворени.
Периодот се користи да се изврши неопходното белење, фарбање огради, санации и поправки на санитарни јазли, како и уредување на ентериерите односно за целосна реконструкција која на учениците и наставниците ќе им овозможи подобри улови за работа и следење на наставниот процес.
– Во ОУ „Крсте Мисирков“ во Гевгелија реконструкциите се при крај, а истовремено течат подготовките за целосна обнова на подрачното основно училиште во селото Моин, за што се обезбедени преку 2 милиони денари од Министерството за образование, потврдија од училиштето.
Оваа учебна година во подрачното училиште во Моин две наставнички во комбинирани паралелки изведуваа настава за 12 ученици кои, веројатно во поголем број, наесен ќе ги пречека комплетно реновирано училиште. им/хс/
