Штип, 2 април 2020 (МИА) – Граѓаните на Свети Николе конечно културните настани ќе можат да ги следат во затоплена или климатизирана кино сала. Градоначалникот на Општина Свети Николе, Сашо Велковски вели дека е почната постапката за решавање на овој долгодишен проблем.
– Добивме убава вест од Центарот за развој на Вардарски плански регион. Распишан е тендер за јавна набавка за реализација на проектот „Изведба на систем за греење и климатизација на кино сала со помошни простории“ при Домот на култура „Крсте Мисирков“ во Свети Николе, вели Велковски.
Вредноста на инвестицијата е 100.000 евра, а се обезбедени од Бирото за регионален развој. Сите понудувачи своите понуди можат да ги достават до 16.04.2020 година.
–Со ова го решаваме конечно горчливиот проблем за затоплување на кино салата и нејзина климатизација и отвараме можност за нејзино користење во сите временски услови во текот на целата година, рече Велковски. вдј/вг/
