Саудискиот престолонаследник Мохамед бин Салман го поддржал израелскиот заговор за соборување на јорданскиот крал Абдула Втори во замена за старателство над светите места во Ерусалим, објави либанскиот весник „Ал-Ахбар“.
Весникот цитираше официјален јордански безбедносен службеник дека обидот за соборување на кралот Абдула Втори е „шема“ во која се вклучени Израел, ОАЕ, Саудиска Арабија и САД.
Според неименуваниот службеник, големиот и комплициран државен удар вклучувал многу страни, но кралот успеал да го спречи мирно, притоа зачувувајќи ја внатрешната и регионалната рамнотежа.
„Будноста на кралот и брзото движење на воените и безбедносните сили го спречија обидот за пуч со кој сакаа да го отстранат и да го заменат со неговиот брат, принцот Хамза Бин Ал-Хусеин“, вели изворот.
Израел, продолжува изворот, планирал да го собори кралот Абдула Втори поради спротивставувањето на Јордан на американскиот мировен договор за Блискиот Исток наречен „договор на векот“, што Аман го смета за план да се најде алтернативна татковина за Палестинците и да се анектира долината на Јордан кон Израел.
Весникот додава дека саудискиот престолонаследник се согласил да ја поддржи израелската шема за возврат за пренесување на старателството над светите места во Ерусалим од Јордан на Саудиска Арабија.
Со одобрение од САД, се вели во написот, Бин Салман го овластил поранешниот началник на кралскиот двор, Басем Авадалах, да ги направи потребните подготовки за трансфер на власта на ниво на семејството, додека соборениот шеф на Фатах, Мухамед Далан, бил задолжен за мобилизирање на Палестинците во Јордан и локални племиња.
Според написот, Саудиска Арабија вооружала некои јужни племиња, издавајќи им државјанство за возврат за извршување воени дејствија ако биде потребно.
