Администрацијата на Џо Бајден одобри продажба на оружје на Саудиска Арабија во вредност од 650 милиони долари.
Во соопштението на Пентагон се вели дека дозволата на Кралството да купува американски ракети ќе „ја подобри безбедноста на пријателската земја“.
Продажбата се случува неколку месеци откако претседателот Бајден рече дека ќе ја прекине американската поддршка за „офанзивните операции“ на Саудиска Арабија во Јемен, вклучително и продажбата на оружје.
Ова ќе биде прва голема продажба на оружје од страна на администрацијата на Бајден на кралството на Персискиот залив, пишува Al Jazeera English.
Во соопштението на Пентагон се вели дека американскиот Стејт департмент ја одобрил продажбата за да му помогне на Ријад да се спротивстави на сегашните и идните закани.
„Оваа продажба ќе ја поддржи надворешната политика на САД и националната безбедност на Соединетите држави помагајќи да се подобри безбедноста на пријателската земја која продолжува да биде важна сила за политички и економски напредок на Блискиот Исток“, соопшти Пентагон.
Се додава дека компанијата „Рејтеон“ со седиште во Масачусетс ќе биде „главен изведувач“ за продажба на напредните ракети со среден дострел.
Бирото за политичко-воени прашања на Стејт департментот објави дека ракетите не се користат за гаѓање копнени цели.
„Видовме зголемување на прекуграничните напади врз Саудиска Арабија во изминатата година“, се додава.
За продажбата не е потребно одобрение од Конгресот, но пратениците можат да го блокираат договорот со донесување закон за неодобрување во Сенатот и Претставничкиот дом.
Продажбата на ракетите следеше откако Соединетите Американски Држави одобрија договор за одржување на хеликоптери за Саудиска Арабија од 500 милиони долари во септември.
