Германскиот амбасадор во Москва Геза Андреас фон Геир бил поканет во руското министерство за надворешни работи поради протерувањето на руските дипломати од Германија, пренесуваат медиумите во светот.
Германската министерка Аналена Бербок претходно изјави дека Берлин прогласил двајца вработени во руската амбасада за персона нон грата поради случајот со убиството на грузискиот државјанин Зелимкан Кангошвили.
Германското Министерство за надворешни работи денеска оцени дека одлуката на Русија да протера двајца дипломати од амбасадата во Москва не е изненадување, но смета дека е целосно неоснована.
„Министерството за надворешни работи на Русија денеска го информираше германскиот амбасадор во Москва дека двајца членови на германската амбасада во Москва се прогласени за непожелни. Според информациите добиени од руска страна, станува збор за реципрочна мерка поврзана со прогласувањето на двајца членови на руската амбасада во Берлин за непожелни“, се вели во соопштението на министерството.
Од таму посочуваат дека одлуката на германската влада од минатата недела била соодветна реакција на пресудата во Берлин, според која убиството од пред две години во Берлин е извршено по државна наредба, што е сериозно прекршување на германскиот суверенитет.
Се нагласува дека германската влада сака соработка со Руската Федерација врз основа на меѓународното право и со меѓусебно почитување.
„Денешната одлука на руското министерство повторно ги оптоварува нашите односи“, соопшти министерството.
На 15 декември Берлин прогласи двајца вработени во руската амбасада за непожелни поради убиството на грузискиот државјанин Зелимкан Кангошвили.
Претходно Врховниот суд во Берлин го прогласи рускиот државјанин Вадим Соколов (Красиков) за виновен за тоа убиство и го осуди на доживотен затвор.
Според германското обвинителство, делото е извршено по налог на „руската влада“, а одбраната инсистирала дека нема доволно докази за тврдењата на обвинителството, пишуваат агенциите.
