Руските власти го уапсија Илја Сачков, директор на големата руска компанија за сајбер безбедност „Груп ИБ“, под сомнение за велепредавство.
Судот во Москва објави дека Сачков ќе остане во притвор два месеци.
Компанијата објави дека руските безбедносни служби вчера извршиле претрес во нејзините канцеларии во Москва. Од „Груп ИБ“ се уште не ги коментирале информациите и апсењето.
Таа е една од најистакнатите руски компании во сегментот на сајбер -безбедност. Компанијата е фокусирана на истрага за криминал од висока технологија и измама преку Интернет.
Компанијата има клиенти низ целиот свет, вклучувајќи банки, енергетски компании, телеком и Интерпол.
Адвокатот на Сачков во моментов не е достапен за коментар, а во овој момент не е јасно на што точно се однесуваат обвинувањата, пишуваат руските медиуми.
За велепредавство во Русија постои казна до 20 години затвор, а деталите од таквите случаи, како што пишуваат агенциите ретко стигнуваат до јавноста поради нивната доверлива природа.
