Уште две тела се пронајдени во област изгорена од шумски пожар што беснее веќе петти ден во северна Калифорнија во близина на границата со Орегон, со што бројот на жртвите од најголемиот шумски пожар во државата оваа година се искачи на четири, соопштија официјални лица.
Последните две жртви се пронајдени во посебни домови покрај автопатот што минува низ пожарна зона во Националната шума Кламат на околу 500 километри северно од Сан Франциско, се вели во соопштението на Канцеларијата на шерифот на округот Сискију.
Посмртните останки на уште две лица, кои очигледно се обиделе да избегаат од пожарот во последен момент, биле откриени во неделата во изгорен автомобил покрај истиот автопат, соопштија претставници на шерифот.
Властите соопштија дека нема да бидат објавени дополнителни информации за ниту една од жртвите додека не се изврши идентификација и додека не се известат најблиските.
Откако избувна во петокот, пожарот уништи повеќе од 56.000 хектари шума, висока трева и четка, соопштија во вторник пожарникарите.
Околу 4.500 луѓе добија наредба да се евакуираат во вторникот, изјави портпаролката на шерифот Кортни Крајдер, истакнувајќи дека околу 100 објекти се зафатени во пламен.
Речиси 5.000 станбени згради низ округот се загрозени од пламените јазици, пренесуваат светските агенции.
