Полицијата го приведе лицето кое што објави видео на социјалната мрежа ТикТок, а на кое се гледа како двајца мажи учат дете да пука со пиштол. Според информациите се работи за 39-годишен маж од селото Боговиње. Видеото предизвика голем број коментари и критики во јавноста.
„ Во врска со случајот пренесен преку видео снимка на социјалната мрежа „Тик-Ток”, МВР преку Секторот за компјутерски криминал и дигитална форензика при Бирото за јавна безбедност веднаш презеде мерки и активности за утврдување на деталите од видеото, меѓу кои и откривање на идентитетот на лицето.
Како резултат на тоа, денеска во 20.10 часот полициски службеници од СВР Тетово го лишиле од слобода А.Џ.(39) од с.Боговиње, поради основано сомнение дека на социјалната мрежа „Тик-Ток“ објавил видео, на кое малолетно дете пука со пиштол, а му помагаат две лица“ соопшти МВР вечерва.
Како што се наведува, приведениот е задржан во Полициско одделение Камењане и се преземаат мерки за расчистување и документирање на случајот, по што против него ќе биде поднесен соодветен поднесок за „недозволено изработување, држење и тргување со оружје или распрскувачки материи”.
Притоа за настанот е информиран и Центарот за социјална работа, кој презема соодветни мерки согласно нивната надлежност.
