Хинтерштодер, 1 март 2020 (МИА) – Французинот Алекси Пинтуро го освои малиот Кристален глобус во алпска комбинација по четврти пат во својата кариера. 28-годишниот светски шампион во дисциплината победи на трката во австриското одморалиште Хинтерштодер со вкупно време од 2: 04,90 минути, откако беше втор во спуст и прв во слалом.
Пинтуро го остави зад себе со 0,99 секунди Швајцарецот Мауро Кавицел, кој беше лидер по првата трка, а Норвежанецот Александар Омод Килде заостана 1,25 секунди. Најдобрите шест ги комплетираа Норвежанецот Кетил Јенсруд, Италијанецот Рикардо Тонети и претставникот на домаќините Матијас Мајер.
Во финалниот пласман, Пинтуро има 280 бода по три старта во алпската комбинација. Килде заврши на второто место со 172 поени, додека Мејер и Тонети ја поделија третата позиција со по 140 поени. Со неговиот успех, кој е петти од почетокот на сезоната, Французинот се најде на второто место во генералниот пласман за Светскиот куп.
Тој има 1.048 бода, на само 34 бода зад Александар Омод Килде, кој е прв со 1.082 поени. Трет е уште еден Норвежанец – Хенрик Кристоферсен, со 981 бода.
