Гевгелија,16 април 2020 (МИА) – Одроните на локалниот пат до гевгелиското планинско село Ума, кои беа предизвикани од неодамнешниот дожд се отстранети по акцијата што ја организираше Општина Гевгелија.
На повикот за помош, како што соопшти одделението за комунално уредување, што го упати општината, се јавија гевгелиските градежни фирми „Мансард“ и „Обнова“ кои без надомест ја ангажираа механизацијата и за многу кусо време ги отстранија одроните и го оспособија повторно за сообраќај локалниот пат до селото Ума.
Претходно, од одрон исто така беше блокиран и локалниот пат од Негорци до потпланиското село Серменин кој со интервенција на Општина Гевгелија брзо беше оспособен за сообраќај.
Од одделението за комунално уредување нагласија дека по двете интервенции моментално сите патишта во Општина Гевгелија се проодни. им/фф/
