Велес 4 март 2020 (МИА) – Општина Градско почна со подготвителни активности, а следниот понеделник ако дозволат временските услови, ќе стратува и со реконструкција на локалниот пат од село Долно Чичево спрема Градско во должина од 1.800 метри.
Со реконструкцијата, локалниот пат од сегашните 3,5 метри ќе се прошири на 4,5 метри, а вклучувајќи ги и банкините, ќе биде 5,5 метри.
Проектот е вреден 17 милиони денари, а средствата се обезбедени преку Агенцијата за финансиска подршка на земјоделството и руралниот развој. Општината треба да плати 18 проценти данок на додадена вредност. Изведувач на работите е А.Д. „Бетон“ од Скопје.
Градоначалникот Роберт Бешовски за МИА вели дека врз старата дотраена асфалтна лента, ќе се стави нов слој асфалт од 12 сантиметри што ќе може да ги издржи и тешките товарни возила. Во зависност од временските услови, се очекува градежните работи да завршат за околу два месеца.
-Со изградбата на овој пат ќе се овозможи подобра сообраќајна комуникација меѓу двете населени места и жителите од соседните села. Воедно ќе се придонесе и за непречено и безбедно минување на тешка механизација на фирмите кои имаат и свои стопански субјекти во овој регион во Општина Градско, потенцира Бешовски. ад/мч/
