Охрид, 25 февруари 2020 (МИА) – Во Општинскиот електро-машински училишен центар „Свети Наум Охридски“ во тек се активности за реконструкција на таваните во објектот и поставување ново осветлување. Се поставуваат висококвалитетни плочи за спуштен плафон со соодветна лед електрика во сите училници, училишните ходници и административни простории, со средства во износ од 1,6 милиони денари обезбедени од буџетот на Општина Охрид.
Истовремено со општински средства се врши и поврзување на објектот на новата спортска сала со котларата за парно греење, која се наоѓа во подрумските простории на училишната зграда, активност вредна 630 илјади денари.
Претходно беше сменет и покривот на училиштето, а беше поставена и нова дограма и се реновираа дел од училниците.
Предвидено е поставување нова енергетски ефикасна фасада на училишната зграда и реконструкција на училишната работилница за практична настава, како и замена на подовите во сите училишни простории. аб/скс/
