Прилеп, 9 април 2020 (МИА) – Во Прилеп денеска има регистрирано нови осум лица заразени од коронавирусот. Бројката се искачи на вкупно 46 лица, што значи дека Прилеп е трет во државава по бројот на заболени.
Според Драгица Николоска, директор на Центарот за јавно здравје, станува збор за локална трансмисија и за непочитување на мерките.
– Ако во почетокот стануваше збор за први, втори контакти, сега веќе е локална трансмисија. Ова покажува дека доволно не се почитуваат мерките кои, сметам дека и на ова ниво се доволно ригорозни. Ситуацијата не треба да се потценува, истакна Николоска по денешниот состанок на прилепскиот кризен штаб.
Во Пирлеп досега се направени вкупно 250 тестови.
– Секој ден од матичните лекари се закажуваат од седум до десет тестови, по епидемиолошка индикација по седум до осум тестови и од инфективното одделение. Секојдневно до Институтот за јавно здравје се испраќаат од 15 до 25 тестови. Досега, поради појавата на коронавирусот се затворени три компании во градот. Тоа е на доброволно барање на работодавците. Тие фирми се времено затворени, додаде Николоска. ем/бт/
