Министерството за здравство информира дека според Институтот за јавно здравје, во Скопје заклучно со вчера активни се 450 лица позитивни на Ковид-19, или дадено по општини: во Чаир активни се 111, Бутел – 54, Сарај – 48, Аеродром – 45, Гази Баба – 42, Центар – 28, Карпош – 26, Кисела Вода – 18, Арачиново – 17, Студеничани – 17, Ѓорче Петров 15, Илинден 11, Шуто Оризари – 9, Петровец – 5, Чучер-Сандево – 2, и Сопиште – 2.
Од денеска од 21 часот до понеделник до 5 часот наутро, се ограничува движењето на граѓаните на сите општини од град Скопје.
„Скопје е една функционална единица. Многу луѓе, покажаа и анкетите од прашалникот со заболените, со нивните контакти, дека циркулираат низ целиот град. Со оваа мерка го штитиме целиот град Скопје,“ истакна министерот за здравство Венко Филипче на вчерашната прес-конфекција.
Институтот објави и податоци за бројот на заболени во Тетово и општините што гравитираат околу Тетово каде вкупно се регистрирани 88 случаи. Од нив, 63 во Тетово, Теарце – 15, Брвеница – 4, Боговиње – 4, и по еден во Јегуновце и Желино.
Освен во Скопје, Владата донесе одлука за враќање на полицискиот час и рестрикциите на движењето во Куманово, Липково, Штип, Тетово, како и Боговиње, Брвеница, Теарце, Желино и Јегуновце, како и општина Карбинци.
Во сите други градови полицискиот час ќе трае од четврток (4 јуни) од 21 часот до петок (5 јуни) до 5 часот наутро. Во петок, сабота и во недела полицискиот час ќе почнува од 16 часот и ќе трае до следниот ден до 5 часот наутро.
