Битола, 11 март 2020 (МИА) – Македонско научно друштво-Битола објави јавен повик за учество со авторски трудови на Научно-стручен собир „Академски такт за фолклорот и етнологијата“ кој ќе се одржи на 29 мај 2020 година.
Научниот собир е посветен на два јубилеи, 60 години од основањето на МНД-Битола и 50 години од одржувањето на првото издание на Републичкиот фестивал на народни песни и игри „Илинденски денови“.
Од МНД-Битола информираат дека авторските трудови ќе бидат објавени во Зборник, а може да се пишува за состојбите, проблемите и перспективите во областа на фолклорниот аматеризам, истражување, зачувување, едукација, презентација и сценска валоризација на автохтоните, изворните содржини и изрази од богатото народно духовно и материјално културно наследство, пет децении Републички фестивал на народни песни и игри „Илинденски денови“-Битола, Републичкиот фестивал на народни песни и игри „Илинденски денови“ како генератор на живото егзистирање на народната култура, Републичкиот фестивал на народни песни и игри „Илинденски денови“ – репрезентативна сцена за стручно и научно проучување на народната култура, фолклорот во 21-от век, академска едукација на нови ресурси од областа на етнографијата-состојби и перспективи, како и за младите и негувањето на македонскиот фолклор и традиција.
Стручно-научниот собир е поддржан од Министерство за култура во рамки на програмата за проекти од национален интерес во културата од областа на фолклорот за 2020 година, а рокот последен рок за аплицирање на јавниот повик е 20 март 2020 година. мт/аа/
