„Недозволиво е Димитар Ковачевски и Бујар Османи да молчат за францускиот предлог за решавање на бугарскиот спор со Македонија. И дополнително да велат дека не го виделе, а всушност и самите го договарале. Со таканаречениот француски предлог не се решаваат проблемите на државата. Не се почнуваат преговори, туку се дава услов доколку сакаме да ги почнеме преговорите. Со предлогот се задира и во идентитетот и во јазикот иако навидум се чини дека јазикот е решен, сепак ѝ се остава простор на Бугарија со декларација да го објасни својот поглед на јазикот“, рече, меѓу другото, на денешната прес-конференција портпаролката на ВМРО-ДПМНЕ, Марија Митева.
Таа вели дека „целта на предлогот е сите барања на Бугарија да влезат во рамка на преговори, а нивната имплементација да ги следи посебна комисија. Со тоа проблемот што до вчера бил со Софија, сега Македонија треба да го има со целата ЕУ“.
„Ова е дебакл за македонската дипломатија, нокаут за нацијата. Доколку власта на сила протурка вакво решение, тоа ќе значи дека Македонија или ќе се бугаризира или воопшто никогаш нема да влезе во Унијата. Ова не се европски вредности, ова е чиста асимилација и практикување на правилото на посилниот“, вели Митева.
Таа го повтори ставот на ВМРО-ДПМНЕ „дека нема да го поддржи францускиот предлог, кој значи бугаризација за нацијата и оддалечување на Македонија од ЕУ“.
„ВМРО-ДПМНЕ нема да прифати никаков понижувачки договор на штета на нашите национални интереси. А ако Владата реши да го носи надвор од Собранието или на сила во Собранието, тогаш идната влада на ВМРО-ДПМНЕ нема намера ниту една точка од овој договор да почитува и да применува“, рече Митева.