Куманово, 24 мај 2020 (МИА) – Младинскиот оркестар од кумановскиот центар за култура „Трајко Прокопиев“ денеска одржа мини концерт пред платото на установата што беше пренесуван на локална телевизија, по повод двата празника Свети Кирил и Методиј и Рамазан Бајрам.
Концерот се одржува во рамки на проектот кој го спроведува отсекот за превенција од СВР Куманово „Празниците зближуваат“.
– Поради моменталната состојба одбележувањето и активностите се скромни и со почитување на мерките и препораките за заштита и спречување на Ковид 19. Годинава, мотото под кое се спроведува настанот е „Заедно за наше Куманово“ и како и досега целта е да се промовира заедништвото, почитувањето, разбирањето, изјави Виолета Богдановска од отсекот за превенција од СВР Куманово.
Пораката која ја упатуваат организаторите е дека Куманово заеднички се справи со многу предизвици, а ќе се справи и со сегашниот преку почитување на мерките и препораките на Владата и надлежните здравствени институции. ам/оџ/
