Шефот на Мерцедес, Тото Волф најави дека неговиот тим најверојатно ќе вложи официјален протест против болидите на Ред бул на трката во Азербејџан доколку ФИА не го санкционира австрискиот тим за подвижното задно крило.
ФИА веќе издаде техничка директива за менување на правилата за задното крило, но таа влегува на сила на 15 јуни, што значи дека тимовите ќе можат да се тркаат со вакви крила и на трката во Баку, каде што има еден од најдолгите рамни делови и придобивката на Ред бул може да биде огромна.
„Мислам дека ако тие крила се на болидите во Баку ќе има огромна предност и ќе одиме кај стјуардите. Ако тоа не е доволно ќе одиме до Интернационалниот апелационен суд на ФИА. Затоа, ФИА мора да ги разјасни работите пред трката во Баку, за да нема хаос“, изјави Волф по трката во Монако, каде што со победата Макс Ферстапен го презеде водството во генерален пласман кај возачи, а Ред бул кај конструктори.
> Мерцедес се заканија со протест во Баку за крилото на Ред бул <
