Вицепремиерот задолжен за европски прашања, Бојан Маричиќ, го пречека претседателот на Европскиот совет, Шарл Мишел, кој попладнево слета на охридскиот аеродром „Св. Апостол Павле“.
Маричиќ му посака добредојде на Мишел и изрази големо задоволство од неговата посета, која е во исклучително важен момент за нашата земја и за целиот регион.
„Во пресрет на јунскиот Самит на француското претседателство оваа посета е одлична можност со г-динот Мишел да го повториме ставот за нашата стратешка определба и партнерство со ЕУ, но и да поразговараме за идните планови за натамошниот развој на Западен Балкан и ЕУ“, вели вицепремиерот.
Во рамки на посетата, претседателот на Европскиот совет, Шарл Мишел, кој е во мини балканска турнеја, ќе биде гостин на вториот Преспа форум за дијалог, каде заедно со претседателот Стево Пендаровски, ќе го отворат со првата сесија, на која ќе говорат и претседателите на Слованија, Борут Пахор, на Хрватска, Зоран Милановиќ, на Косово, Вјоса Османи – Кадриу и претседателот на Црна Гора, Мило Ѓукановиќ.