Белорускиот претседател Александар Лукашенко ја претстави идејата за уставниот референдум со цел да се смират масовните протести.
Десетици илјади луѓе се собраа во Минск во неделата на третиот по ред протестен викенд поради спорните претседателски избори на 9 август, на кои Лукашенко беше избран за претседател по шести пат.
Според државната агенција „Белта“, Лукашенко изјавил дека „експерти“, вклучително и судии на Уставниот суд, работат на измени на Уставот за кои ќе се изјаснува на референдум.
„Би сакал тие промени да го подобрат нашето општество. Ние ќе инсистираме на тие промени и ќе им ги понудиме на нашиот народ“, рече Лукашенко на работниот состанок.
Белорускиот претседател не изнесе повеќе детали, но тој и порано ги спомнуваше измените во Уставот, а Москва ја оцени таа иницијатива како ветувачки излез од кризата.
