Русија ќе го продолжи дијалогот со Западот за безбедносни прашања и е подготвена за одвоени разговори за нуклеарни ракети со среден дострел, изјави денеска рускиот министер за надворешни работи, Сергеј Лавров.
По разговорите со полскиот министер за надворешни работи и претседавач со ОБСЕ, Збигњев Рау, во Москва, тој ги отфрли информациите дека Русија планира инвазија на Украина нагласувајќи дека тоа е информативен тероризам.
Лавров посочи и дека разговорите за безбедносните барања на Русија во рамките на ОБСЕ би биле интересни, но таквата дискусија, според него, не може да биде замена за разговорите со САД и НАТО.
„Без каков било напредок со овие другите, разговорите со ОБСЕ би биле бесмислени“, рече Лавров по средбата со Рау.
Според руската агенција ТАС С, тој изјавил и дека САД и НАТО во своите документи дале позитивни одговори на некои руски безбедносни иницијативи, кои долго време ги одбивале.
„Западот, конечно, одговори кога сфати дека разговараме за потребата од радикални промени во областа на безбедноста. Одговорот на Западот беше позитивен на некои од иницијативите што тој долго време ги отфрлаше“, рече Лавров.
Тој изрази надеж дека отповикувањето претставници на одредени земји од специјалната мониторинг-мисија на ОБСЕ во Донбас е навистина поврзано со формални причини и дека мисијата нема да го повтори искуството на слична структура што оперира во Косово во 1999 година, пишува „Спутник“.
„Знаејќи дека земјите за кои станува збор, всушност, се во првите редови на овие информативни терористички информации, ненамерно ми паѓа на памет дека можеби имаат некои скриени мисли“, рече Лавров.
