Косово и Србија немаат друга алтернатива освен да постигнат конечен договор за нормализација на односите, изјави косовскиот премиер Албин Курти во интервју за „Блумберг“, додавајќи дека е дојдено време тоа да се направи за време на неговиот мандат.
„Мораме да имаме договор, а дојде време за време на мандатот на нашата влада. Гледам можност. Оваа есен ќе биде доста одлучувачка за да видиме дали треба да бидеме оптимисти“ – изјави Курти.
Тој рече дека гледа потенцијал за договор во констелацијата на администрацијата предводена од американскиот претседател Џозеф Бајден, претседателката на Европската комисија Урсула фон дер Лајен и српскиот претседател Александар Вучиќ.
Рече и дека негова најголема грижа е што Вучиќ се уште не се оградил доволно од своето минато кога беше министер за информации за време на владата на Слободан Милошевиќ во 90-тите години, пишува „Косово онлајн“.
Тензиите меѓу Србија и Косово се разгореа минатиот месец откако Курти се заложи за барање Србите кои живеат во Косово да имаат документи издадени од Приштина наместо лични карти и таблички на автомобили издадени од Белград. Бидејќи локалните Срби ги блокираа патиштата во знак на протест и по притисокот од меѓународните посредници, Приштина ја одложи својата одлука за еден месец до 1 септември.