Движењето на руските трупи низ целата земја не треба да ги засега другите држави бидејќи тоа не претставува никаква закана за нив, рече портпаролот на Кремљ, Дмитриј Песков, коментирајќи ја забелешката на украинската армија за воените трупи на Русија долж границата со Украина, пренесува ТАСС.
„Руската Федерација ги преместува вооружените сили на нејзино тло како што сака. Ова не треба да засега никого и тоа не претставува никаква закана за никого. Москва ги презема сите потребни мерки за да ја осигури безбедноста на своите граници“, нагласи тој.
Песков истакна дека „руските трупи никогаш не учествувале и не учествуваат во вооружени конфликти на територијата на Украина“.
„Што се однесува до учеството на руските трупи во вооружениот конфликт на територијата на Украина, руските трупи никогаш не учествувале во него и не учествуваат ни сега. И ние, европските земји и сите светски држави не би сакале повторно да се разгори граѓанската војна во Украина како резултат на провокации и провокативни чекори на украинската војска “, нагласи тој.
