Дебар,11 јуни 2020 (МИА) – Во организација на дебарската организација на Црвен крст денеска во просториите на Општата болница во Дебар, беше спроведена крводарителска акција.
-Ова е втора акција годинава бидејќи другите планирани за овој период беа одложени поради состојбата со Ковод-19. Денешната може да се оцени како успешна, бидејќи за време на неколкучасовниот престој на екипата на Институтот за трансфузиологија од Скопје, од пријавените 40-тина лица, крв даруваа 29 од нив, вели Исни Телќиу, секретар на дебарскиот Црвен крст.
На претходната и оваа акција собрани се 80 крвни единици. И на двете акции поголемиот број од крводарителите се млади.
За годинава, вели Телќиу, планирани се вкупно седум редовни акции, а доколку има потреба ќе организираме и вонредни, но сето тоа зависи од договорот со Институтот и потребите за драгоцената течност, што живот значи.
Годишниот план за крводарување предвидува да се соберат 744 крвни единици. Дебар е еден од градовите во државава каде редовно се исполнува планот, а не ретко и се надминува. вт/рп/
