Бугарскиот вицепремиер и министер за одбрана Красимир Каракачанов, во интервју за БТВ рече дека Македонија можно е уште долго да чека за влез во Европската Унија.
„Доколку Македонија продолжи да се однесува како ментор на Бугарија и како земја која ги определува условите, уште долго време ќе чека за влез во Европската Унија“, изјави Каракачанов.
Според него, Бугарија има право да бара од земјите кандидати за членство во Унијата да ги почитуваат условите, а во таа насока Каракачанов укажа на бугарската национална безбедност.
Рече дека Скопје води инает и има претензии за бугарската историја.
„Не може да не им се извиниш на оние луѓе што си ги убивал и тормозел десетици години, само затоа што биле Бугари и да кажеш: ‘ама ние имаме идентитет со векови’“, вели Каракачанов.
Тој додаде дека македонскиот идентитет во 1944 година бил создаден со насилства, убиства и репресии кон Бугарите.
