Политиките на се уште актуелниот претседател Христијан Мицкоски носат само порази и ја уништуваат ВМРО-ДПМНЕ, велат од Иницијативниот одбор за свикување на вонреден конгрес во ВМРО-ДПМНЕ.
Оттука преку соопштение нагласуваат дека додека СДСМ денеска слави во Штип, членовите на ВМРО-ДПМНЕ се понижени и потиштени бидејќи првиот човек на партијата, Христијан Мицкоски, не им дозволи да се борат на изборите.
„Во ситуација на здравствено-економска криза, бугарско вето и бројни скандали, СДСМ успеа да добие 1600 гласови повеќе од гласовите кои ги освои во јули во Штип. Почист и појасен показател дека граѓаните не гледаат алтернатива во Мицкоски, нема. Тоа се виде и на слабо посетените протести, кои беа организирани секаде, освен во Штип. Членовите на партијата и неутралните граѓани го отфрлаат лицемерието на Мицкоски и политиката на бегање. Неодлучноста на Мицкоски го ситни ВМРО-ДПМНЕ. На референдумот не застана ни против, ниту пак повика на бојкот. Избега од соочување и на овие избори. Мицкоски вака ги загуби и Охрид и Ново Село. Мицкоски вака ги загуби и Претседателските и Парламентарните избори. Или Мицкоски или ВМРО-ДПМНЕ!“, порачаа од Иницијативата за конгрес.
Понатаму, наведуваат дека е време за оставки и одговорност, бидејќи Мицкоски нема капацитет да ја води партијата.
