Крива Паланка, 2 јуни 2020 (МИА) – Членови на извидничкиот одред „Наум Наумовски Борче“ од Крива Паланка и нивните старешини спроведоа акција за расчистување на дворот и околината на просториите на некогашниот младински центар „Вавилон“ каде е лоцирана и канцеларијата на одредот.
Акцијата се реализира под мотото „Мрдни со прст за зелена и чиста урбана околина“.
– Иако пандемијата ги сведе на минимум сите наши активности и предвидени јавни настани, активности на отворено предвидени за вклучување на заедницата, во изминатите три месеци нашите младинци и во домашни услови имаа задача речиси за секој ден, реализираа предизвици и задачи со одговорност и усвојување вештини што самостојно ги спроведуваа и ги презентираа онлајн. Деновиве по олеснување на мерките, почитувајќи ги сите препораки и мерки, под мотото „Мрдни со прст за зелена и чиста урбана околина“ ги исчистивме дворот на одредот и околината на објектот, како дел од редовното одржување, што е наша обврска, но и задача да им пренесеме и всадиме работни навики и одговорност за грижа за околината на младите, изјави Свете Милановски, од извидничкиот одред.
Десеттина извидници ги искосија зелените површини, извршија отстранување на камења и останати отпадоци кои, како што истакна, биле фрлани во изминатите неколку месеци од страна на несовесни граѓани. ид/мс/
