Претседателот на Украина, Володимир Зеленски, денеска изјави дека имал одличен разговор со неговиот американски колега Џозеф Бајден и му се заблагодарил за безрезервната поддршка.
„Благодарен сум на американскиот претседател што му помогна на украинскиот народ, како на полето на безбедноста, така и на полето на финансиите. Разговаравме за понатамошни чекори на патот кон победата над агресорот и важноста Русија да биде одговорна за воените злосторства“ – напиша Зеленски на Твитер.
Овој разговор доаѓа еден ден откако Бајден објави одлука за нова воена помош за Украина вредна близу три милијарди долари, вклучувајќи противвоздушни ракети, артилерија, дронови и радари, потсетува „Гардијан“.
Новиот пакет е најскапата американска воена помош за Киев досега, со што вкупната помош на администрацијата на Бајден за Киев е над 13 милијарди долари.