Заминувањето на Лионел Меси претставува тежок финансиски удар за Барселона. Консултантската компанија „Бренд фајнанс“, направи анализа, на загубите што ќе ги претрпи клубот со заминувањето на фудбалерот кој 21 година беше симбол на „Ноу Камп“.
Поради заминувањето на Меси, Барселона, од вкупната вредност ќе загуби 11 отсто, односно ќе изгуби 137 милиони евра од својата вредност. Клубот е проценет на 1,26 милијарди евра.
Според овој извор, најмногу пари, Барселона ќе загуби во спонзорскиот дел, околу 77 милиони евра, плус 43 милиони евра, од продажбата на дресови и останатите клупски производи.
Лошата финансиска ситуација го „избрка“ Меси од Барселона. Поранешниот фудбалер, Роналд де Бур, смета дека за тоа е виновна лошата трансфер политика во изминатите години и задолжувањата за да можат да се реализираат трансферите на Филипе Кутињо и Антоан Гризман.
„Сами ја предизвикаа оваа ситуација. Дел од одговорноста има и кај Ла Лига, бидејќи со години не реагираше туку само гледаше што се случува. Истото важи и за шпанската влада, која требаше да реагира. Кога имате компанија која секоја година се задолжува преку кредити за да го санира минусот, јасно е дека еден ден компанијата ќе пропадне. Тука лежи проблемот. Да трошиш стотици милиони евра за трансферите на Кутињо, Дембеле и Гризман, во ситуација кога немаш пари е неверојатна. Тука Ла Лига требаше да реагира, требаше да им каже дека тоа не смеет да го прават“, рекол Де Бур.
> Заминувањето на Меси претставува тежок финансиски удар за Барселона <
