Германската министерка за образование Ања Карличек сака да го забрза усвојувањето на планот за вакцинација на деца и адолесценти, бидејќи смета дека само така може да се отворат училиштата помалку или повеќе нормално по летниот распуст, пишува ДВ.
Карличек (ЦДУ) бара да се направи распоред за вакцинација во сите провинции за деца и адолесценти на возраст од 12 години и посочува дека до почетокот на следната учебна година на секој наставник во земјата треба да му се понуди да се вакцинира.
Барањето на германската сојузна министерка треба да се разгледа следната недела, на состанокот на сојузните и покраинските влади.
Претходно, сојузниот министер за здравство, Јенс Шпан (ЦДУ), побара вакцините на „Бионтек“ да бидат достапни за учениците, за училиштата повторно да бидат отворени.
Европската агенција за лекови во моментов работи на забрзано одобрување на вакцината на Бионтек-Фајзер за деца на возраст од 12 до 15 години, а САД веќе започнаа да вакцинираат деца и адолесценти.
Според резултатите од едно истражување, задоволството од животот за време на пандемијата кај деца и адолесценти се намалило за дури 21 процент.
Повеќе од половина од нив станаа понесреќни во тековната учебна година, како што објавија од здравственото осигурување „ДАК-Гезундхајт“, кое го нарача студијата. Меѓу таа популација, наводно, има зголемување на емоционалните проблеми.
