Основното јавно обвинителство Струмица спроведе истрага против три лица – двајца мажи и една жена, за убиството на 22-годишното момче во Струмица.
Во попладневните часови на 5 јули, на улицата Бетовенова во Струмица, по настаната вербална расправија, тројцата осомничени лишиле од живот едно лице и со умисла го довеле во опасност животот на тројца други оштетени.
Расправијата започнала за паркинг-место пред куќа, по што сите тројца осомничени со ножеви му задале повеќе убоди на сега починатиот. Тој паднал на земја и починал на лице место. Кога членовите на неговото семејството се обиделе да му помогнат на оштетениот, осомничените и нив ги нападнале, нанесувајќи им телесни повреди – убодни рани со нож.
Судија на претходна постапка од Основниот суд во Струмица го прифати предлогот на надлежниот јавен обвинител и на тројцата осомничени синоќа им определи притвор во траење од 30 дена.
