Гевгелија, 22 мај 2020 (МИА) – Од воведувањето на вонредната состојба поради пандемијата со Ковид-19, гевгелиски „Комуналец“ кој опслужува 9.000 физички лица и 800 правни субјекти, се соочува со намалена наплата на комунални сметки во месеците март и април, посочија денеска од јавното комунално претпријатие.
– Во споредба со истиот период лани, наплатата на нашите услуги во просек е намалена за 20 отсто, но посебно е намалена априлската наплата на сметки кај правните лица и таа изнесува 30 отсто во споредба со месец април 2019 година, рече директорот Златко Зумров.
И покрај намалената наплата, Зумров соопшти дека „Комуналец“ и понатаму останува активно вклучен во активностите кои се надвор од основната дејност, како што се дезинфекциите на улиците и јавните површини, на влезовите на станбените згради, на градската капела, пазарот, машинско метење на улиците и опслужувањето на дезинфекциските бариери за возила на влез и излез од градот Гевгелија кои дополнително го оптоваруваат материјалното работење на претпријатието.
– Сите овие активности од нас бараат поголем ангажман на работна сила и носат поголеми трошоци за гориво како и за обезбедување на дезинфекциски и заштитни средства за вработените,но сметам дека успешно ќе се справиме со проблемите и ќе помогнеме во заедничката борба против пандемијата, истакна Зумров. им/са/
