Битола, 11 април 2020 (МИА) – Во Битола заврши масовната акција за дезинфицирање на улиците и јавните прометни површини на подрачјето на Општина Битола.
Општинскиот кризен штаб информира дека во акцијата од 7 до 17 часот дезинфицирани се најфреквентните улици во градот, но и населени места на Општина Битола.
-Акцијата ја координираа екипи на ЈП „Комуналец“, а во акцијата се вклучија и ЈКП „Водовод“, КЈП „Нискоградба“, ЈП „Паркинзи“, Територијалната противпожарна служба, екипи на ЕСМ-РЕК Битола, ЈП „Стрежево“, приватните компании „Зимак“, „Стентон градба“, ЗИК „Пелагонија“ како и волонтери од руралните средини. Во акцијата беа вклучени пет цистерни, 22 трактори, една метларка, 50 рачни пумпи и останати возила за логистика. Според претходно подготвениот оперативен план, градот беше поделен на 27 реони и сите се дезинфицирани, информираа од Општина Битола.
Според соопштението за јавност, во акцијата посебен акцент бил ставен за во Широк Сокак и дворот на Клиничката болница, а дезинфекција е извршена и на урбаната опрема – клупи, детски и спортски реквизити, корпи за отпадоци и патеките до влезовите на зградите за колективно домување.
-Дезинфекција е извршена и во руралните средини, а според оперативниот план и на предлог на градоначалничката Наташа Петровска, акцијата ќе продолжи и во наредните денови, посочија од општинскиот кризен штаб во Битола. мт/хс/
