Берово, 13 февруари 2020 (МИА) – Во Берово e објавен јавен оглас за финансиска поддршка на здруженија на граѓани и фондации од општинскиот буџет за 2020 година. Распределбата на средствата, како што информираат од општината, ќе се врши согласно програмските активности на здруженијата и фондации.
-Средствата од Буџетот на Општина Берово во вкупен износ од 300 илјади денари, ќе се користат за финансирање на програмските активности на здруженијата и фондациите, преку грантови за програми и проекти. Активностите на апликантите согласно првата мерка треба да бидат насочени кон локален економски развој, туризам, заштита на животната средина, социјална кохезија, енергетската ефикасност и обновливите извори на енергија, образование, култура и спорт, информираат од општината.
Распределбата, како што додадоа, ќе се врши врз основа на одлука на Советот на Општина Берово, на предлог на комисијата за финансирање, буџет и локален економски развој формирана од советот.
-Доделените средства треба да се користат исклучиво за намената за која се доделени и на начин определен во предлог-проектот. Во рок од 30 дена по завршувањето на своите програмски активности, а најдоцна 31 јануари наредната година, здруженијата на граѓани и фондации треба да достават финансиски и наративен извештај за користењето на средствата, според дадените формулари за наративен и финансиски извештај, додадоа од општината.
Рокот на поднесување на пријавите е до 28 февруари 2020, а повеќе детали околу критериумите и начинот на пријавување се објавени на општинската веб-страна. вс/са/
