Либиските безбедносни сили насилно го прекинаа протестот на мигрантите пред затворениот социјален центар на Обединетите нации во Триполи, соопштија денеска активисти и мигранти.
Војниците пристигнале преку ноќ, го „скршиле“ протестот и уапсиле стотици луѓе, изјавил еден од активистите Тарик Ламлум, пренесе АП.
Уапсените биле испратени во притворен центар во блискиот град Аин Зари, додека другите успеале да побегнат, додаде Ламлум.
Ламлум, кој работи со локалната организација за човекови права Белади, рече дека најмалку еден водач на мигрантската заедница бил застрелан за време на рацијата.
Мигрантите, вклучувајќи жени и деца, кампуваат пред центарот на заедницата во Триполи од октомври, барајќи заштита и барајќи подобар третман од либиските власти.
