Пратеничката група на ВМРО-ДПМНЕ ја напушти денешната пленарна седница обвинувајќи за непочитување на Деловникот.
Од ВМРО-ДПМНЕ образложија дека ја напуштиле седницата поради тоа што одлуката за изменување и дополнување на одлуката за избор на претседател, заменик-претседател и членови на Комисијата за прашања на изборите и именувањата повторно се стави на пленарна седница, без да го помине филтерот, а тоа е самата Комисија.
„Членот 20 од Деловникот предвидува изборот на членовите на Комисијата за изборите и именувањата на конститутивната седница да се врши на пленарна седница. Меѓутоа, веќе сме активни и имаме одредени работи на таа Комисија, така што промената и измената на членовите треба да оди во согласност со членот 108 од Деловникот, што владејачкото мнозинство и претседателот Џафери упорно го избегнуваат, каде што се вели дека изборот на претседател и членови на работни тела оди по предлог на Комисијата за прашања на изборите и именувањата, а врз основа на листата што ја предлагаат пратеничките групи“, изјави координаторот на пратеничката група на ВМРО-ДПМНЕ, Никола Мицевски.
Тој оцени дека е очигледно прекршувањето на Деловникот. Обвини дека владејачкото мнозинство, не сакајќи да ја поминат целата деловничка процедура преку Комисијата за изборите и именувањата, тоа пополнување на Комисијата планираат да го направат преку пленарна седница.
