Првиот човек на Комисијата за заразни болести, Жарко Караџовски во изјава вели Владата спротивно на препораките на Комисијата дозволила свадби. Владата предводена од Зоран Заев прави што сака и тоа по цена на човечки животи. Се кара и со стручната фела, реагираат од опозициската ВМРО-ДПМНЕ за состојбата со коронавирусот во земјава.
„Тоа говори дека се неспособни, менуваат одлуки и препораки заради политички калкулации, си поигруваат со здравјето. Си поигруваат и со економијата, еднаш затвораат угостителски објекти, еднаш за да се влезе бараат сертификати, во меѓувреме секој прави што сака“, потенцираат од ВМРО-ДПМНЕ.
Оваа постапка на Владата, сметаат од партијата на Мицкоски, говори како што велат, дека поединци, но и целата Влада не ја слуша стручната фела, а последиците од политичките калкулации на Заев и неговите пријатели кои седат во владиниот кабинет резултира со човечки жртви, се истакнува во соопштението од ВМРО-ДПМНЕ.
