Французин најверојатно ќе се соочи со смртна казна со стрелање во Индонезија, откако беше обвинет за злоупотреба на повеќе од 300 деца и тепање на оние кои не сакале да имаат полов однос со него.
Полицијата соопшти дека го уапсила пензионерот Франсоа Абело Камил (65) во хотел во Џакарта минатиот месец, каде што две малолетни девојчиња биле во собата со него.
Доколку биде осуден, тој се соочува со смртна казна или доживотен затвор, пишува Дејли Меил.
Инспекторите рекоа дека пронашле видеа на лаптопот на Камил на кои извршувал нелегални сексуални акти врз стотици деца на возраст од 10 до 17 години.
„Тој им плаќал помеѓу 17 и 70 долари на оние што се согласувале да имаат секс со него“.
Пензионерот влегол неколку пати во Индонезија во последните пет години со туристичка виза, велат од полицијата.
„Тој им пристапувал на децата за да ги примами, нудејќи им работа како модели“, рече пред новинарите началникот на полицијата во Џакарта, Нана Суџана.
Видеата што кружат на Интернет го покажуваат Камил со лисици на рацете на прес-конференција. Неговата глава е сведната, а го чуваат 10 индонезиски полицајци.
Полицијата верува дека Камил со години ги злоупотребувал индонезиските деца и дека може да има повеќе жртви.
