Поради огромен пожар во Кејптаун, денеска беа евакуирани три 17-катни згради.
Пожарот избувнал рано наутро во близина на спомен-обележјето на британскиот тајкун и политичар Сесил Родс на Ѓволскиот врв, дел од Кејптаун во подножјето на планината Тејбл, каде е сместен Универзитетот Кејптаун (UCT), еден од најпрестижните универзитети во Африка.
Објектот на универзитетската библиотека е сериозно оштетен, а околу 250 пожарникари се борат против огнот, пренесува Би-би-си.
Пожарот ја зафатил зградата на студентскиот кампус, еден близок ресторан е целосно уништен, а пожарникарите користеле и хеликоптери во акцијата.
Облакот чад од кампусот можел да се види на оддалеченост од неколку километри, а за време на гаснењето на пожарот, еден пожарникар претрпел изгореници и бил пренесен во болница на лекување, објави претходно „Ројтерс“.
Според проценките на противпожарната служба, ќе бидат потребни најмалку три дена за пожарот да се стави под контрола.
