Коалицијата СДСМ-ДУИ не е за напредок на државата, туку за продолжување на лагите, криминалот и корупцијата, посочи на денешната прес-конференција Дафина Стојаноска од ВМРО-ДПМНЕ.
„Оваа коалиција е за продолжување на матните тендери, распродажба на државните интереси за сметка на личното богатење. Македонија нема да види преродба туку стагнација, проблеми и продлабочување на поделбите“, рече таа.
Според неа, ваквата коалиција е канцер за македонското општество и извор на криминалот.
„Сè што ветуваа пред изборите сега не важи. Заев за ДУИ сметаше и изјавуваше дека пет пари не вреди, дека време им е за опозиција, дека во Мала Речица било седиштето на криминалот. Потпретседателот на СДСМ, Зекири, сметаше дека ДУИ е канцерот во македонското општество. Од ДУИ, пак, сметаа дека СДСМ ги интересира само тендери и дека ја лажат македонската јавност“, потсети претставничката на ВМРО-ДПМНЕ.
Додаде и дека јавноста треба да очекува уште поголема економска криза, затоа што, како што рече, една милијарда евра наместо за спас од корона-кризата биле потрошени за изборен поткуп.
„Европската иднина на државата ќе остане далечна, затоа што со криминал и корупција нема европска иднина. Правдата за оние кои се огрешиле спрема законот ќе остане недостижна и далечна, а ќе продолжат бизнисите и личните интереси“, рече Стојаноска изразувајќи го ставот на ВМРО-ДПМНЕ.
