Од денес, француските кафулиња и ресторани имаат дозвола повторно да ги послужуваат гостите на отворено, по шестмесечна блокада, а францускиот претседател Емануел Макрон исто така го „прослави“ повторното отворање, пиејќи кафе во друштво на премиерот Жан Кастекс.
„Еве сме! Тераси, музеи, кина, театри. Да ги откриеме повторно работите што ја сочинуваат уметноста на живеењето“, напиша Макрон на својот профил на „Твитер“, кој пиеше кафе во кафуле во близина на Елисејската палата, пренесува „Ројтерс“.
Nous y sommes !
Terrasses, musées, cinémas, théâtres… Retrouvons ce qui fait notre art de vivre. Dans le respect des gestes barrières. pic.twitter.com/UXfOKur9D0— Emmanuel Macron (@EmmanuelMacron) May 19, 2021
Како дел од ублажувањето на мерките воведени за борба против коронавирусот, во Франција, од денес, на шест лица им е дозволено да јадат заедно на отворените тераси на ресторани.
Полицискиот час исто така е поместен и започнува во 21.00 часот, а не во 19.00 часот, пренесува „Би-би-си“.
Сепак, иако се отвораат барови и ресторани, нема да им биде дозволено да работат во затворено.
По неколку месеци затворање, покрај рестораните, кафулињата и продавниците ќе бидат отворени и кина, театри, музеи и спортски објекти. Кината и театрите ќе работат со 35 проценти од капацитетот и ќе можат да примат максимум 800 лица.
Некои медицински експерти во земјата изразија загриженост за бројот на нови случаи на дневна основа, кој сега во просек се движи околу 13.000, но е многу помал отколку кога бројот на новозаболени беше над 40.000 минатиот месец.
