Со контроверзен закон Заев и Филипче сакаат да протнат криминална зделка за нов клинички центар, ВМРО-ДПМНЕ целосно го отфрла. Ова на прес-конференција го изјави Игор Николов.
Според него, СДСМ и Владата предводена од оваа партија, продолжуваат со концептот на демонтирање на здравствениот систем.
„Наместо анализа на новонастанатата состојба во здравството со корона-епидемијата, наместо утврдување на потребите и приоритетите на здравствениот систем, деновиве СДСМ е во криминален поход за реализација на проект, кој секоја година го најавуваат, а тоа е нов Клинички центар. Зајакнувањето на капацитетите на здравствениот систем е приоритет за сите. Тоа зајакнување не треба да се изведе со нетранспарентен процес и закон од само 9 членови, кој не обезбедува никакви детали за тоа што ќе се добие на крајот од проектот“, рече Николов.
Според опозициската партија, денес ќе дебатирале за потребата од втор клинички центар, доколку СДСМ не го прекинеле проектот Клинички центар Мајка Тереза.
Николов вели и дека власта предлага закон за клинички, а ги нема решено имотно-правните односи на самото земјиште, не им е отпочната постапката за експропријација.
„Немаат анализа за потребата од централизација или пак децентрализација на здравствениот систем настаната од корона епидемијата, немаат проект, немаат испитувања за геомеханиката на земјиштето, ниту за евентуални археолошки наоѓалишта“, вели Николов.
Градбата на нов клинички центар вака како што тие го замислуваат и сакаат да го протуркаат претставува извор на корупција, рече Николов и додаде дека овој предлог е само една работна верзија на закон. Овој предлог наместо да обезбеди одбирање на најдобрата компанија, стимулира некаква заедница на компании.
Николов посочи и дека самата јавна набавка е спорна.
„Ова е работна верзија на закон, со оваа работна верзија се елиминира конкуренцијата, не се добива најдобриот понудувач туку се стимулира можноста за фиктивни понуди. Дури, постои и однапред можност за однапред договорени фиктивни понуди“, додаде Николов.
Претходно денеска, министерот за здравство, Венко Филипче порача дека опозицијата треба да го одблокира законот.
