Гелзенкирхен, 9 мај 2020 (МИА) – Рестартирањето на Бундеслигата следната недела ќе им даде надеж на другите европски првенства дека ќе можат да бидат комплетирани, и покрај пандемијата од КОВИД-19. Ова го изјави тренерот на Шалке, Давид Вагнер.
Германскиот шампионат, кој беше суспендиран во март, продолжува на 16 мај, а ќе бидат преземени најстроги санитарни мерки за да се спречат нови избувнувања на болеста, која веќе достигна скоро 4 милиони луѓе ширум светот и уби повеќе од 270 000.
– Не е изненадувачки што прво се обновува германското првенство. Германците се многу дисциплинирани луѓе кои бараат брзи и ефикасни решенија. Сите ги следат правилата, сè е на распоред, сè е типично германски, изјави Вагнер за британски „Тајмс“.
Поранешниот тренер на англиски Хадерсфилд, кој е добар пријател со Јирген Клоп, додаде дека менаџерот на Ливерпул, исто така, го очекува и обновувањето на Бундеслигата, бидејќи ова е шанса да се заврши и Премиер лигата.
– Сите сега ја гледаат Германија и велат: „Добро, ако Германците можат да го сторат тоа, тогаш имаме шанса и ние да го сториме. Тоа е токму она што ми го рече Јирген“. Знам дека во Англија се молат Бундеслигата да продолжи без никакви проблеми, бидејќи ова ќе биде охрабрувачки знак. Англија е можеби 4 или 5 недели зад Германија, но може да се израмни, убеден е тренерот на Шалке.
Во првото коло од рестартираното првенство следната недела, Шалке ќе се сретне со локалниот ривал Борусија Дортмунд
